احلى بروستد فراخ وبطريقة مضمونة

النهاردة هقدملكم طريقة البروستد
من مطبخى ( سهل آوى بس بياخد شوية وقت )

المكونات

لتتبيل الفراخ

فرخة صغيرة اقل من كيلو
مقطعة 8 قطع
ولازم تشرحيها بالسكينة 
( وده مهم عشان تستوى كويس )
بصلة متوسطة 
عصير 2 ليمونة
معلقة خل كبيرة
4 فصوص تومكبار
معلقة صغيرة فلفل اسود
معلقة صغيرة شطة
كوب لبن رايب
او علبة زبادى كبيرة مضاف ليها كوب ماء

بالنسبة لتغطية الفراخ هنحتاج

2 بيضة 
2 كوب دقيق كبير
معلقة صغيرة بصل بودرة ومعلقة توم بودرة 
( مفيش يبقى 2 كيس مرقة دجاج فورية )معلقة صغيرة فلفل اسود
معلقة صغيرة بابريكا
معلقة صغيرة شطة 
معلقة صغيرة حبهان مطحون
معلقة ملح كبيرة
2 معلقة كبيرة بقسماط
معلقة صغيرة بكنج بودر

ودى صورة المكونات
معلش مصورتش البهارات



ودى الفراخ مغسولة كويس ومتقطعة





الطريقة

. هنفرم البصل والتوم فى الكبة مع التوابل 

. هنضيف ليهم اللبن الرايب ونتبل الفراخ 



. هنسيبها فى التلاجة ليلة كاملة وتتعمل تانى يوم
يعنى تبليها من بليل مثلا والصبح اعمليها للغداء

اولا هنعفر قطع الفراخ بالدقيق قبل ما نضيف ليه البقسماط والتوابل
نعفر الفراخ يعنى نرش عليها دقيق بسيط 

وطبعا هنكون حاطين الزيت على النار يسخن
لحد ما نخلص كل قطع الفراخ

. هنضيف البقسماط والتوابل والملح للدقيق 



. هنضرب البيض ونحط قطع الفراخ فيه ونقلبها كويس



. هنحط قطع الفراخ فى الدقيق بالتناوب مش كلهم مرة واحدة طبعآ



. ندعكها كويس بأدينا فى الدقيق ونغطيها خالص 





القلى

. دلوقت الزيت بقى سخن
مش يكون سخن جدا جدا يعنى وسط نار متوسطة
وممكن نختبره بشوية دقيق صغيرين لو فار يبقى تمام نحط قطع الفراخهنقليها فى زيت عميق فى حلة مثلا
عشان الزيت يغمر الفراخ وتستوى كويس

. هنقلى الفراخ حوالى 10 دقايق اول 3 دقايق سيبى النار عالية
عشان التغطية متروحش من الفراخ وتبقى طرية
وبعد كده نخلى النار هادية ونغطى الحلة
ولما تاخد اللون الذهبى نطلعها على شبك زى كده
مش مناديل عشان متبقاش طرية
لو معندكيش يبقى مصفاه





وتتقدم مع بطاطس مقلية وعيش وكول سلو 

للعضوة:

Just Smile

من فتكات

تصنيف : طبخ