اللوبيا ام عين سودا للمبتدئات

اللوبيا الناشفه ام عين سودا.

 عمتو لولا loula shouman

يمكنك ايضا قراءة:

طريقة عمل اللوبيا للمبتدئات

المقادير



لحمه مسلوقه حسب احتياجك


ربع كيلو لوبيا ناشفه منقوعه 8 ساعات في ميه عاديه


2 ملعقه كبيره سمنه 


بصله متوسطه مبشوره


كوب عصير طماطم و 2 ملعقه كبيره صلصة طماطم


ملح و فلفل اسود


معلقه سكر رش وتوم بودر

الطريقه 


اسلقي اللحمه اولا 


اللوبيا طبعا نضفيها وانقعيها 8 ساعات فى المية 


اغسليها من مية النقع ونزليها فى حله مناسبه مع ميه 


3 اضعاف كمية اللوبيا ولعي عليها النار


سيبيها تغلي 5 دقايق فقط


لان لوبيا اليومين دول بتستوي بسرعه جدا


واحيانا باضيفها للصلصه بدون سلق باكتفي بالنقع فقط


وباكمل سواها في الصلصه


والي في الصورة ما سلقتهاش




المهم لو حضرتك سلقتيها ضيفيها سخنه للصلصه


حتى لا تنفصل القشره وتتهري في الصلصه


يعني جهزي الصلصه وابدأي اسلقي اللوبيا

ابشري البصلة وصفريها في السمنة تاخد لون وردي محمر


ضيفي عصير الطماطم وملعقة الصلصة 


والسكر والملح والفلفل الاسود ورشة توم بودر


سيبيها تتسبك قليلا وتبدأ السمنه تظهر على الوش


انزلي باللوبيا المسلوقه واللحمه المسلوقه


واخلطيهم وسيبيهم يغلوا مع بعض يشربوا من التسبيكه


وضيفي كبشتين شوربه بتغلي من شوربة اللحمه 


وخلي بالك تغطي اللوبيا ب 1 سم فقط


علشان تبقى مش صايصه وكل ما تحتاجي زودي


وخليهم يغلوا مع بعض وظبطي الملح


وقدميها سخنه


وبالف صحه وعافيه




ملحوظه


نفس الطريقه للفاصوليا الناشفه


ولكن لابد من سلق الفاصوليا البيضا



لا داعي لاضافة ثوم للوبيا والفاصوليا


بيغير طعمها وبتكون تقيله

رشة التوم بتضيف نكهه محببه للوبيا
وبتغني عن التوم الفريش

في ستات بتضيف مكعبات جزر


ولا داعي اطلاقا لاضافتها


في اكلات لو غيرنا او اضفنا لها مكونات جديده


بتغير الطبخه تماما 



واللوبيا الناشفه والفاصوليا الناشفه


من اكلات الجدات

تصنيف : طبخ