تخزين الطماطم وتعقيمها خارج الثلاجة

ى البداية كده الطريقة دى انا شفتها فى التى فى على فتافيت فى برنامج مارثا ستيوارت من كام سنة
وعملتها وعجبتنى لان ساعات بعمل تسبيكة او صلصة وبشيلها فى الفريزر وبيكون مافيش مكان

ولانها سهلة اوى تلاقيها فى اى وقت للبيتزا او صلصة المكرونة او الكفتة او اى حاجة تانية بتحبوها
وفى نفس الوقت ارخص من اما تشتروها لانها بقت متوفرة هنا فى مصر فى الماركات
هى ايه بقى؟؟
الطماطم السليمة المعلبة (اللى بتكون قطع كبيرة دى)
مقاديرها بسيطة اوى ومتوفرة ان شاء الله

طبعا ده موسم الطماطم ورخيصة وجميلة وحمرا وطعم



يبقى اول حاجة كمية من الطماطم مغسولة ونضيفة

 
تانى حاجة برطمانات ازاز نضيفة
واهم حاجة يكون غطاها معدن لان الغطا البلاستيك مش هينفع معانا 

 تالت حاجة هنحتاج حلة فيها مية سخنة وبتغلى على البوتاجاز
وحلة تانية فيها ميه عادية من الحنفية (هقولكم ليه)

 
نبدأ الشغل بقى

هنجيب الطماطم المغسولة ونقطعها من تحت علامة +

 
ونسقطها فى المية المغلية لمدة 20 ثانية بالظبط
لاننا مش عايزين نسلق الطماطم
احنا يا دوب بنفك القشرة من عليها

 بعد ال20 ثانية نطلع الطماطم ونحطها فى الميه الباردة علشان نساعد القشرة انها تطلع بسهولة
وكمان علشان نعرف نمسك الطماطم من غير مانتلسع

  شوفوا تقشيرها سهل ازاى

 علبال ما نقشر باقى الكمية نستغل الوقت ونعقم البرطمانات
حلة فيها ميه على البوتاجاز ونحط فيها البرطمانات وغطيانها (علشان كده قلت ماينفعش غطا بلاستيك)
ونسيبهم يغلوا لمدة 10 دقايق
وماتخافوش مش هينكسروا
ولازم لازم تكون المية مغطية البرطمانات

 نكمل الطماطم
ونقطعها نصين علشان نشيل البذور منها

 حنجيب مصفى وتحتها طبقق او حلة ونشيل البذر من الطماطم فى المصفى
والميه هتنزل فى الطبق
(المية دى هنحتاجها)

 هنا عدت ال 10 دقايق وهنخرج البرطمانات م نالمية المغلية
وخلوا بالكم اوى لان الميه بتكون سخنة جدا
وهنطلعها بالملقاط ده ونصفى المية كويس 

 هنسيب البرطمانات تتصفى على فوطة مطبخ نضيفة
وهى هتنشف بسرعة ونكون كملنا الطماطم

  ده بذر الطماطم و بنصفيه كويس

  ودى كمية الميه اللى نزلت من البذر

 دى بقى المرحلة المهمة هنعبى الطماطم فى البرطمانات
وبنحط فى كل برطمان نص معلقة ملح (كمادة حافظ) ومهم اوى اننا نضغط الطماطم فى البرطمان علشا الهوا
ولو لقينا لسه فى فراغات ندخل سكينة علشان نفرغ الهوا (وده لازم علشان ماتعفنش مننا)
ونكمل الفراغات دى بالميه اللى قلت لكم هنحتاجها

لو حبيتى تحطى اى منكهات عندك مفيش مانع يعنى ممكن فلفل اسود صحيح
او ورقتين ريحان او ورقتين نعناع او فلفلاية حامية او عود زعتر اخضر
او ورقتين كسبرة خضرا او شبت اخضر
يعنى الاختيار ليكى

 كده خلاص الحمدلله عبينا البرطمانات كلها
خناخد البرطمانات ونحطها فى حلة فيها ميه سخنة على البوتاجاز
ولازم الميه تكون مغطيه البرطمانات زى كده

  وهنسبهم لمدة 3 دقايق علشان التعقيم

 \
 وادى الطماطم بعد ما خزناها وعقمناها وبعد 100 فل و 14

 
طبعا دى بتقعد بالشهور مايجرلهاش حاجة والله عن تجربة
واجمل مافى الموضوع انك اما تيجى تفتحى البرطمان تسمعى صوت التكة
طبعا ما تفتحى البرطمان وتاخدى اللى انتى عايزاه وفاض شوية تشيليه فى التلاجة
المصدر http://forums.fatakat.com/thread3767211
العضوهخساية

تصنيف : تدبير منزلى