تحذيرات مهمة للام المصرية لدكتور احمد الخطيب

19 ساعة

١. مينفعش كل اما طفلك يسخن ، تطَلَّعى الدكتورة اللى جواكى 😂، وترزعيه أنتى بيوتك من غير لازمة أو جرعة ضعيفة أو جرعة غير كاملة -بتدى الإزازة وخلاص- ،، معظم أسباب الحرارة غير بكتيرية😡

٢. تانى وتالت ومليون ، "كحة مع نهجان مع تزييق صدر" الثلاثي ده لو اتكرر ،، حرام تعالجيه غلط عند دكتور غلط ، >٩٠٪ دى حساسية😧😧

٣. ابنك لما يرجّع سيبيه ، متقربيش منه ،، آه والله !
لو "ريّحتى" المعده ٤-٦ ساعات ،، الترجيع هيقف لوحده* ،، وبلاش الأسلحة الفتاكه زى موتيليوم وانتينال😁 ،، ليه مش قادرة تستوعبي ان المعده تعبانه ومش مستحمله أى حاجه من فوق ،،وان الأنتينال مطهر "معوى" مالوش علاقة بالترجيع😭

٤.تانى يا ماميز 😡 قلنا ١٠٠ مرة لما ابنك يسخن متغطيهوش وتقولى بيرتعش ، هوّى الأوضه وقلعيه الهدوم ، و"اغمريه" حرفيّا تحت الدُّش ١٠ دقايق كاملين ،، بروفين بعد ٦ شهور ودولفين بعد سنة وسيتال آمن من سن يوم ،، اه والله 😉

٥. إسهال مش بيعمل جفاف ، ولا تسلخات ، ولا بيأثر ع الوزن ، ولا فيه دم ،، يبقى سو وات 😎؟

ميتعالجش يا حاجّه👿!

٦. مش كل عياط انتفاخات ! ادّوا فرصه للنزلات الشعبية ولارتجاع اللبن اللى بياكل جزء من بطانة المرئ ويعمل وضع "ساندفير"**وللتسلخات!!
صدقونى هتكتشفوا٦٠٪ من عياط البيبيهات 😭

٧. خطة علاج الإمساك -أى إمساك- قائمة على تفريغ القولون ( لبوس أو حقن شرجية) بعد كده ملينات قوية جداً لمدد طويلة ،، إنما الأم اللى خلّت بنتها "مدمنة لبوس" عشان تريّح نفسها حسابك عند ربنا!

٨. عينك على ابنك وبنتك أول سنة !!
احفظى العلامات الخطيرة لتأخر النموّ ***(اللينك تحت) عدم وجود حدّ في العيلة "متأخّر عقليا" مش *صك ضمان* ان ابنك يطلع نابغة ،، لأ ممكن يكون متأخر برضه ،بالذات لو ابنك "اتعرض لنقص أكسچين عند الولادة Hypoxia"، أو" الصفرا عدّت ١٦" أو " شكله غريب شوية Dysmorphism" !!

٩. نقول كمان ؟

ڤيتامين د من أول يوم ٤٠٠ وحدة ، الحديد من السادس ، ڤيتامين أ الصحة بتدّيه ف التاسع ، ومطلوب حضرتك تدى كبسولتين أ-ڤيتون كل ٦ أشهر لحاادّ خمس سنين ،،ڤيتامين ك مرة واحده عضل عند الولادة ( للوقاية من نزيف الدم) ،، ٩٩،٩٩٩٩٪ مش بيتاخد ،، عشان كده بنشوف نقط دم ف البول ، نزيف دم ، ترجيع دم ، وساعات- بعيد عن ولادنا- نزيف مخ! أقولك على حاجه ؟ ريحي نفسك واشترى لكل البيبيهات من الصيدلية كوناكيون أمبول كامل يعطى بالفم مرة واحدة- خلى بالكو نختار اللى بيُعطىٰ بالفم (IM/oral).

١٠. لأ ، مش عاوزين كالسيوم ، لبنك كفايه ، والصناعى كفايه ، ولما تفطميه ٣-٤ علب لبن او زبادى ٢٠٠ مل كفاية ، مش عاوزين ألفا كالسيدول ولا كارينو ولا الحاج وان ألفا ولا أوستيوكير !! لبنك وڤى دروب وتوكلى على الله❤

١١.وجود الميكروب السبحى أو سرعة الترسيب العالية مش مبرر أبداً اننا ندّى بنسلّين طويل المفعول عشان "الواد عضمه بيوجعه ، وعاوز ابره تدلّعه"😂 تشخيص *الحمّى الروماتيزميه* قائم على معايير عالِم اسمه چونز مش على مزاجنا!!
م الآخر كده :
لازم ولابد وحتماٍ يكون في التهاب مفاصل متنقل من مفصل لآخر أو القلب مصاب أو حركات لا إرادية مفاجئة أو طفح جلدى أحمر الأطراف أو عقد تحت الجلد فوق المفاصل( نادرة جدا) ،، لو ولا حاجة من دول موجوده ،، يبقى مش حمى روماتيزمية قولاً واحداً ووقفى البنسللين 👍

١٢. بتدّى ليه مضادّ حيوى في أمراض الطفح الجلدى😡
"كل الأمراض دى مالهاش اي علاج غير الاعراض بس ،، وفيتامين أ(أ فيتون) في الحصبة، زوفيراكس اول ٢٤ ساعه ف الجديرى ... بس كده !!!"

١٣. لأ متوقفيش الرضاعة عن طفلك الأول لما تحملى ف طفلك التانى ، وكلى واشربى كويس بس اه ،، ببساطه كده😃ًًً. *****

١٤. قبل ما تفكرى في اللبن الصناعى ،، ادّى الولد الثدى ٢٤*٢٤ ساعه ، وصحّيه ،، وخليه يمُصّ ،، واشربي ٣ لتر سوايل يوميا، حلبة ومغات ، موتيليوم وهيربانا ،، وكلى اكل متوازن !!
فشلتى ؟؟ اسألى دكتور متخصص ف الرضاعة الطبيعيه ،، لأ مترضعيش صناعى!!

١٥. يعنى إيه تدّى ابنك صناعى عشان بتشتغلى ٨ ساعات الصبح 👿
حضرتك هتتمرنى على تعصير الثدى قبلها بفترة ،، غرفه هادية ،، مساچ خفيف ، أو عصارة كهربا ،،واحده بواحده هتنزل كمية ،، يوم بيوم تجمعي رضعات ،، اللبن بيقعد في الثلاجه ( الجسم مش الباب) ٢٤ ساعة!
حتى لو اللون والريحه اتغيرت !
عصرى كل يوم لبكره ،، كمية مناسبة لغيابك ،،
وبالهنا والشفا❤

١٦. منع البيض واللبن والزبادي والموز والفراولة والشوكولاته أثناء البرد ده وهم ،، احنا اتغيرنا خالص يا لينا 😉

١٧. المهضمات ، فواتح الشهية ، مقويات المناعه ، فايدتها مساوية تماماً ل "اللنضه" النيون اللى تيته بتحطها ع البيبي اللى عنده صفرا
كلها حاجات بتحسسنا جميعاً بالسلام الداخلى😂

١٨. أحلفلك ع المصحف ما هيتعود عليها 😂

*دكتور بيقنع أمّ بالجلسات ف علاج الحساسية*

١٩. متسئليش على حل العند في طفلك ،، اسألى نفسك الأول هوا ليه بأه عنيد ،، أسلوبنا كلنا للأسف !
تعليم بالفرض والإجبار ،، مش بالتحبيب والتزيين !
خلّى أى قيمة عاوزه تعلميهاله تبقى حاجه غالية يطلبها مش حاجه رخمة يهرب منها.!
فضّى وقت انتى وزوجك لقراءة فن تربية الأطفال،
صدقونى هتفرق معاكو أوى ، هتكسبى ابنك❤

٢٠. متقوليش " الدكتور ده شاطر وعلاجه بيجيب م الآخر،، قولي " الدكتور ده ربنا موفقه وبيشفى الناس على إيده" متعلقيش الشفاء بالدكتور ،، والله والله والله الشفاء من الله وحده ،،
صدقينى بجد بتفرق ،، احنا بس أسباب ،، وربنا اللي بيشفى ❤
وصدقينى برضه هتفرق أوى الشير للمعلومات دي مع أمهات كتير ،،
ربنا ينفع بينا وبيكم آمين❤❤

------------------

تصنيف : أطفالنا أمانة