فن نشر الغسيل

عشان تكملي صورة ست البيت الشاطرة لازم تكوني فنانة ف نشر الغسيل ..

سيبك من المقرفين اللي يقولولك " ماهو كدة كدة هينشف "

دول ياعووو خالص 😷
__
عشان تنشري غسيلك حلو لازم أصلا يترتب ويتغسل حلو


🌼🌼 اتبعي الخطوات التالية :

🌸واحد🌸 : لما تيجي تغسلي فضي السبت كله و افصلي الغسيل اكوام اكوام الابيض

 لوحده لأنه بيتحط ع درجة حرارة 80 او 90 والفواتح زي البيجامات والفوط

 لوحدها بتتحط علي 40 او 50 والملايات لوحدها 40 بردو والألوان لوحدها علي

 0 مية باردة ..


ولو عندك احمرات فوشيهات ياريت تبقي لوحدها ..

 وبردو علي 0
اوعي تكوني من الستات اللي بتقول : ماهو كله هيتغسل وتقعد تحشر الغسالة..


.
__

🌸

اتنين🌸 : امشي بمبدأ مش مهم الكم المهم الكيف يعني مش مهم تملي الغسالة 

وتقولي عشان أخلص لا خليكي ست واعية و حطي الحااجات اللي شبه بعضها بس 

حتي لو كانو قليلين حطي كمية المسحوق أقل مش مهم .. المهم إنه هيطلع نضيف ..

_
_
🌸

تلاته🌸 : ودي حاجة مش كل الناس بتعملها وهتقولو عليها فراغ .. بس أنا شخصيا بعملها وعمري ما عملت غير كدة ..


أنا بطبق الغسيل وأنا بحطه ف الغسالة 😃
اه والله بعمل كدة .. حركة اتعلمتها زمان من جارتنا .. ومن ساعتها بعملها

.. مبتخليش الغسيل يطلع مكرمش من بؤ بوبي وكمان بتبقي الحاجه مفرودة

فبتنضف اكتر مبتكون مكلكعة والبقع متغطية ..




🌸أربعة🌸 : أنا مبغسلش هدوم خروج خاااااالص في الغسالة 

"طرح،باديهات،بندانات،تونيكات،بلوروهات" كله علي إيدي بشاور جل و داوني

__


🌼🌼 خلاص كومنا وطبقنا وشغلنا وطلع الغسيل نيجي لقواعد النشير بقي :
🎀 
في قاعدة عمومية قديمة بتقول إن الطويل ورا والقصير قدام .. ! ‬

🎀 في قاعدة بتقول إن التيشيرتات والبولورهات تتنشر من تحت الباط عشان الديل 

ميوسعش وعشان المشبك لو علم مايوخنقكيش وانتي بتكوي ..

🎀 في قاعدة بتقول إن كل حاجة شبه حاجة يتنشروا جنب بعضهم ..


الفوط جنب بعض ..

 اكياس المخدات جنب بعض وهكذا ملقيش تيشيرت جنب بنطلون

 جنب فوطة جنب ملاية

🎀 في قاعدة بتقول إن البناطيل بتتنشر من الرجل مفيش بناطيل بتتنشر من الوسط الا لو مستعجلة وعايزاه ينشف ..

🎀 في قاعدة بتقول إن الشرابات كل جوز بيتنشر مع بعض لأن المفروض سبحان الله 

لما تيجي تغسليهم بتحطيهم مع بعض لأن الأغرب واللي بندهشلو فعلا إنك بتشتريهم 


أصلا مع بعض ف جو بقي انك تغسلي فردة وفردة لأ وجوزك ولا أبوكي ولا أخوكي 

يقعد يدور علي الفردة التانية دة انسيه تماماااا اوكي ..

🎀 في قاعدة بتقول إن والله العظيم تلاتة الملاية بتتفرد ..

اه والله بتتفرد وتطبقيها نصين وتنشريها حلوة كدا جنب السور ..

 انما ملاية علي اول حبل بمشبك واحد من النص :

🎀 وفي بقي قاعدة بتقول ودي أهم نقطة بقي ..


شغل البوكسرات اللي علي اول حبل دة فرمتيه تماما من دماغك ..

انتي فاهمه غلط دي مش حاجة للفشخره .. دي زيها زي حاجتك ف بتاعة كدة 

بلاستيك بمشابك بتتحط ف الحمام يتعلق فيها الحاجات دي ..

زنقت معاكي وعايزة تنشريهم يبقي ف اول حبل جنب السور .. ماشي


___
وطبعا مش محتاج اقولك إن البلكونة تتنفض وتتمسح والاحبال تتلمع قبل النشير ..


وإن المشابك البلاستيك للأبيض والمشابك الخشب للملون عشان اامشابك الخشب بتصدي ع الأبيض

مواضع متشابهة:
ترتيب فوق الحوض من مطبخ فيروزه روزه


رتبت خزاين المطبخ والادراج بحاجات بسيطة

منقول

تصنيف : تنظيف وتريب المنزل