تفريز وتخزين الاكلات والحلويات والعصاير لرمضان

اولا الخضارالخضار 
(بسله، باميه ،فاصوليا الخضرا)


بتمقعى الخضار كويس ومتنسيش وانتى بتقمعى الباميه بتشيلى
طرف الباميه من تحت حته صغيرة اوى لانها بتبقى فيها ساعات
دود
وبعدين تحطى ميه على النار نص الحله ولما تغلى تحطى فيها الخضار
وياخد غلوتين او 3 غلوات بالظبط وتصفيه ولما يتصفى كويس
وتفرزيه فى كياس وتحطيها فالفريزر
وتعملى الاكل على قد الوجبات
يعنى مثلا اشترينى كيلو بسله
تحطى نص كيلو فكيس والنص الاخر فكيس ومتنسيش
لما تحطى الخضار او اى حاجة فالكيس تطبططيها الاول
عشان تسهل عليكى فكها
او تحطيها فى علب ثلاجه بلاستيك حبايب قلبى وتحتفظى بيها


الطريقه الثانيه لتخزينهم

بعد ما تمقعيهم كويس تغسليهم تحت الحنفيه كويس جدا
وتنشفيهم بفوطه نضيفه
وتحطيهم فكياس زى ما هما كده بدون ولا سلق ولا حاجه وعالفريزر
ولما تطلعيهم حتحسى كانهم طازه تحطيهم فالصلصه على طووووووووول
يعنى من الفريزر عالصلصه دوغرى
وتطبخيهم بطريقتك بقى


اللوبيا والفاصوليا البيضا
حتنقعيهم ليله كامله وتانى يوم تسلقيهم كويس
وبعد ما تسلقيهم تحطيهم فى ميه وفيها ثلح وبعدين
تسبيهم يتصفوا كويس وتحطيهم فكياس وتطبطى الكيس تفرديه يعنى وتفرزيه عالفريزر




ثانيا الفلفل الالوان :


للاسف الفلفل الالوان بيبقى بيبقى فمواسم
وساعات لما تحتاجيه ولا حاجة مش بتلاقيه
زى بالظبط انا لما جيت عزمت اهلى اخر مرة وباتوا عندى
بدور عليه مش لاقياه بس الحمدلله لاقيته فالاخر وعملت بيه
النجرسكو
عشان تحتفظى بالفلفل الالوان ومنين ما تحتاجيه تلاقيه

تقطعى الفلفل الالوان شرائح طويله وتحطيها فى اى علبه
بلاستيك او كيس وتبططيه وتحتفظى به فالفريزر
وتاخدى منه على طول على الاكل من غير ما يفك


ثالثا الفلفلالفلفل الاخضر :


انا بشتريه وبحطه فكياس زى ما هو بدون غسيل
وبقرونه
ومنين ما احتاجه للاكل ولا حاجة اطلعه اغسل القرن واقطعه فالاكل
وبسيب كام قرن عشان لو عملت جبنه قريش ولا سلطه
وبكده بيقعد عندى لفترات طويله ومش بشتريه








رابعا الطماطم :


الطماطم انا بفريزها بثلاث طرق


الطريقه الاولى انى بحطها فكياس زى ما هى وعالفريزر دوغرى
لما اجى اطلعها اطلعها احطها فى كام دقيقه فميه
وبعدين لماا شيل القشرة بتاعتها بتتشال بسهوله وبتستخدم عادى
الطريقه الثانيه بتمسكى الطماطم تضربيها فالخلاط كويس مع بوق مية
وبعد كده تحطي عصير الطاماطم فحله وعلى النار وتسبيكيها
لتتحول لصلصه ومتنسيش تحطى ليها ملح فلفل اسود شطه
شويه بابريكيا لو عايزاها حارة

الطريقه الثالثه
امسك الطماطمالطماطم انضفها كويس واقطعها باى شكل واحط فالحله شويه زيت
واحط الطماطم فيها من غير ميه واغطى الحله
واسيبها لغايه لما الطماطم تستوى وتنزل ميتها وتتسبك حتبقى عامله زى معجون كده
بس كل شويه اقلبها عشان متلزقش فقعر الحله وتتحرق على نار هاديه يا بنانيت
وبعدين بعد ما تبرد اصفيها بالمصفه كويس جدا
وتحطيها فى ااى علبه او برطمان عندك وعالفريزر
ولو عايزة تخلى برطمان فى متناول ايديكى يبقى تحطى على وشها
اى زيت عندك زيت زيتون او زيت ذره وتقفلى البرطمان او العلبه كويس
وتحتفظى بيها
لازم يا بنات يكون البرطمان او العلبه متعقمين بميه مغليه
والعلبه او البرطمان منشفاهم كويس اووووووووووووووووى
بفوطه نضيفه وزى الفل

والطماطم بتيجى فوقت وبتبقى رخيصه فى ناس بتجيب منها كميات
وتعملها باى طريقه من الطرق دى عشان تقعد طول السنه معاها
بس انا لما بشترى الطماطم بشوف الطماطم اللى قربت تبقى طريه او قربت تبوظ
وبعملها بالطريقه الثانيه او الثالثه بدل ما ارميها حرام بس بحطها فى كياس او برطمانات



خامسا الجزر


بتجيبى الجزر وكحتيه بالسكينه او تقشريه بمقشرة البطاطس
وتقطعيه مكعبات صغيره وتحطيه فكيس او فعلب ثلاجه وفالفريزر
زى ما هو بدون سليق يا بنات


سادسا خضار مشكل زى الجاهز:


بعد ما سلقتى الباميه والبسله والفاصوليا
وتحطى عليهم جزر وتقلبيهم جيدا مع بعض وفعلبه او كيس
وفالفريزر بحيث لو احتاجتى تعملى تورلى
وممكن تعمليه بنفس الطريقه دى بس يكون بسله وجزر فقط

سابعا ورق العنب :

للاسف فى ناس لما بتتخزن ورق العنب بتسلقه الاول
وبعدين تخزنه فبتالى لما تيجى تطلعيه ويفك
الورقه ساعات معاكى بتتقطع ومش بتعرفى تلفيه

بيتخزن ازاى يا بنات
بتجيبى ورق العنب وتحطيه كذا ورقه فوق بعضها وهو ناشف زى ما هو
بتلفيه رول وتربطيهم بعنق ورق عنب
ووتححطى رولات ورق العنب فكيس جمب بعضها وفالفريزر
ولما تيجى تطلعى تستخدميه تحطيى زى ما هو اهو على
شكل رولات وتسلقيه وبعد ما يتسلق تطلعى وتصفيه وتفكى الروله
وتبتدى تحشيه


ثامنا القرنبيط :

بتشتريه وتقصيه بالمقص
عشان يبقى قطع صغيرة او متوسطه
وتسلقيه وتفرزيه عالفريزر دوغرى


لما تيجى تطلعيه عشان تعمليه
تطلعيه وتسبيه يفك على مهله من الصبح اول ما تصحى او قبلها بيوم بليل
وبعد ما يفك تجهزى خلطته اللى حتقليه بيها
عباره عن
طبق و وحاطه فيه دقيق وبيض وملح وفلفل اسود وشطه وشويه قرفه مطحونه
صغيرين اوووووووووووى
وتروبيهم مع بعض
وتكونى ضاربه الطماطم فالخلاط
تحطى عصير الطماطم عليه وتقلبيه كويس بمضرب البيض اليدوى
وبعدين
تحطى الخلطه دى كلها فالخلاط مره اخرى وتضربيهم مع بعض
وبعدين تحطى القرنبيط فالخلطه دى وتقليه بعد كده وبالهنا والشفا
والطريقه دى اخدتها من حماتى يا بنانيت

تاسعا الكرنب :


بتسلقى الكرنب كويس وبعدين تفصلبيه
وبعد ما يتفصل تحطى كام ورقه كرنب فوق بعض وتوضبى ورق
الكرنب فوق بعض وتحطيهم فى اى طبق فايبر او علبه ثلاجه بلاستيك
وعالفريزر دوغرى بحيث لما تيجى تطلعيه تطلعيه عالحشو على طول
بعد ما يفك



عاشرا خلطة حشى المحشى :

تحطى فى بوله عندك عصير طماطم + صلصه طماطم + خضرة المحشى
بعد ما تقطعيها حتت صغيرة + ملح+ فلفل اسود+ شطه+ بابريكيا+
مكعب او اثنين مرقه دجاج بس لو حطحطى مرقه دجاج تقللى الملح
وبتديها طعم حلو وتخلطى الخليط ده كويس جدا وتقلبيه وتحطيه فى اى علب
ثلاجه بلاستيك وفالفريزر لما تيجى تطلعيه تسبيه يفك وتعمليه على الارز على طول
سواء نى ف نى او بتاخديه نص سوا الارز على النار مع الخلطه المحشى
لانى باخدوه نص سوا على النار بيبقى طعمه حلو اوى


11- البشاميل :

بتعملى الباشميل بطريقتك وبتشليه فى الفريزر
ولما تيجى تطلعيه بتسبيه يفك الاول وبعدين
تحطيله شويه ميه عالنار وتقلبيه وتحطيه عالمكرونه او اى حاجه
حتعمليها بالبشاميلبالبشاميل 

وانا بحب اعمل البشاميل بلبن سيك او بخففه بشوربه لحمه او فراخ
مثلا لو حتعملى كيلو مكرونه يبقى 2 كيلو لبن وانا بعمله بلبن
سايب بيبقى اوفر لان كيلو ب7 ونص جنيه

ازاى بعمل البشاميل على طريقه وئومة

بكون غاليه اللبن ويكون دافى
وبعدين بحط فى حله دقيق وسمنه بنسب متساويه واقلبهم
كويس لغايه لما يكون لونهم على دهبى سنه بسيطه
ومش دهبى غامق عشان ميطلعش البشاميل غامق
وبعدين بقليهم كويس وعلى طول بمضرب البيض اليدوى
لغايه لما يكون لونهم دهبى ومفيش فيهم كلكعه
وبحط اللبن الدافى بالتدريج بايد وبقلب باليد الاخرى
وبسرعه عشان مش يكلكع وبعدين بخففه ساعات
ببشوربه فراخ او لحمه او ممكن اعمل شوربه من مرقه الدجاج
وبخففه ليكون سمكه وسط مش خفيف اووووووووووى
وقعد اقلب لغايه لما يغلى كام غلوة مش كتير عشان مش بحبه تقيل اوى
وبعد اتبله بملح وفلفل اسود وربع ملعقه صغيرة قرفه مطحونه
واحط فيه ملعقه كريمه او قشطه
واقلبه كويس واقفل عليه
واسيبه لما يبرد وبعدين افرزه الفريزر


12- عصاج اللحمه المفرومة :

بتعملى العصاج عادى جدا ولما يبرد تحطيه فعلب وفالفريزر
على طول ولما تيجى تطلعيه تسبيه يفك وبعدين تسخنيه بشويه ميه
ويستخدم


طريقتى فى عمل اللحمه العصاج
بجيب اللحمه المفرومة وبتبلها بلاتى
ملح فلفل اسود شطه بابريكيا
ربع ملعقه صغيرة من
قرفه جنزبيل ثوم بودر بصل بودر وبقلبها كويس مع بعض
بخلطهم طويس جدا
وبكون مقطعه البصل قطع صغيره او فرماه فالكبه
واخطه تشويح هعلى النار لغايه لما يتبل
واحط اللحمه المفرومه بعد ما تبيلتها وبفضل انا اتبلها قبيليها بيوم من بليل
او قبليها بساعه او ساعتين
واسوى اللحمه المفرومه عادى جدا مع البصل
وحتتحول للحمه عصاج
لما تبرد احطها فعلب او كياس وابططها وعافريزر على طول


13-البصل 
ممكن تفرميه بالكبه ويكون ناعم او خشن على حسب
الملمس اللى انتى عايزاه
او ممكن تعمليه بالمبشره زى ما انا عملته
وحطيته فعلبه
بس شرط لما تعمليه وتحطيه فعلبه او برطمان متضغطيش عليه
تخلى كانه مهوى كده لغايه لما العلبه تتملى شويه
متمللهاش على اخرها
عشان لما تيجى تاخدى بالمعلقه او السكينه
يكون سهل ويطلع معاكى
وانا حطيته فى علبه
لانى لما كنت فمصر وحاطاه فكيس كانت ريحته نفاذه اوى فالكيس
والحمدلله الفريزر بتاعى فمصر كنت حاطه فيه بردك قطعه فحم
فمكنتش ريحته باينه اوى فالفريزر


تطلعى الجزء اللى انتى عايزاه بالملعقه او السكينه
وتحطيه عالنار على طول وتشوفى ايه الطبخه اللى حتعمليه بيها
او عاللحمه المفرومه تحطيها عليها على طول وتخلطيها جيدا
وتشوفى حتعمليها كفته ولا ايه ؟؟
بس تسيبى كام بصله عندك عشان لو حبيتى تعملى جبنه قريش ولا اى حاجه
فهمنى يا بنات انا الكام بصله دول عندى اخدت الكبار بس وسبت البصل الصغير
الكام بصله دول عملوا الكميه اللى فالعلبه واللى فالطبق يا بناااااااااااااات
قبل ما تخلص الكميه اللى مفرزاها حجيب بصل تانى ان شاء الله
اولا طعمه فالاكل حلو ومش متغير نوهائى يا بنانيت
ثانيا بيسهل فالاكل جدا بدل ما كل شويه تطلعى الكبه

14- العدس ابو جبه والعدس الاصفر
يتنقع ساعه وبعدين تصفيه وتسبيه من بليل للصبح
وتانى يوم تنقيه كويس وتسلقيه وبعد ما تسلقيه تحطيه فميه ساقعه وفيها
ثلج وتصفيه كويس بعد كده وتفرزيه فى كياس وعالفريزر
لسه عايزه اعملهم ان شاء الله لانهم عندى
ومتنسيش وانتى بتسلقيهم تشيلى الريم بتاعهم
ولما تيجى تطلعيهم تطلعيهم على طووووووووووووووووول
عالخلطه بتاعتهم


15- محشى الكوسه واالبتنجان 

تقوريهم وبعدين تحطيهم فشويه زيت عالنار كانك بتاخدهم سوتيه
وبعد كده تحطيهم فكياس وعالفريزر دوغرى
ولما تيجى تحشيهم تحشيهم وهما متجمدين زى ما هما
يعنى تطلعيهم عالحشو على طووووووووووووووووووول
وتحطيهك فى الحله بعد كده وتسويهم بطريقتك



16- القلقاس 
الاول تغسليه كويس جدا وتنشفيه وتقطعيه
مكعبات وبعد كده تحطيه فكياس وعالفريزر على طووووووووووووووول
بدون سلق
لما تيجى تطلعيه عشان يطبخ
تطلعيه على طول عالشوربه او على الميه ومتنسيش تعصرى ليمون
عشان مش يبربر


17- الملوخيه الخضرا 
بتتعمل بطريقتين
الطريقه الاولى
تقطفيها وتغسليها كويس كذا مره لغايه لما الميه تبقى نضيفه
زى الفل وتفرميها ناعم يا اما بالجهاز المخصص لفرم الملوخيه او
بالقطاعه بتاعتها
وبعد ما تفرميها ناعم كويس
تحطيها فى طبق
وتسخنى على النار ميه او شوربه وتحطى فيهم ملعقه صغيره
كربوناتو وبعد ما تغلى
تحطى الميه المغليه او الشوربه المغليه على
الملوخيه اللى انتى فرماها ناعم وحطاها فالطبق
وتقلبيها كويس وتحطيها فكياس على قد الوجبه يا بنات
ولو جبتم مثلا كيلو ملوخيه تعملوا الطريقه الاولى دى كل نص كيلو لوحده

الطريقه التانيه

تخزين الملوخيه زى ما هى بالورق الاخضر
تحطى عالنار الميه وفيها ملعقه صغيره كربوناتو
وبعد ما الميه تغلى تحطى فيها
الملوخيه زى ما هى ورق اخضر 3 دقائق فقط
وبعد كده تحطيها فى مصفا تتصفى وتحطيها فى بوله فيها ميه متلجه
بتلج
وتلسها تحطيها فالمصفا وتخزنيها فى كياس على قد الوجبه وتطلعى الهوا من الكيس
وساعه الاستخدام حتطلعيها تحطيها فالخلاط وفالخلاط شويه شوربه او ميه وتضربيها كويس جدا
فاالخلاط وتكملى بقيه طبيخها عادى جدا

18- السمبوسك
تحشيها عادى جدا بلحمه مفرومه او جبنه او خضار
وتلفيها وتحطيها فى علب تلاجه وعالفريزر تطلعيها عالقلى على طووووووووول


19- الحمص 
تسلقيه كويس وتفرزيه فكياس اة علب وعالفريزر دوغرى

20- الكبده 
بشيل نصها زى ماهو
والنص التانى بقطعه اسكندرانى واتبله
واشيله فكياس على قد الوجبات
اطلعها على طول على النار واكون حاطه فالحله او الطاسه
زيت وفلفل اخضر وبعدين اطلعها على طول من الفريزر على الطاسه
واسويها عادى جدا


21- الفول 
تدميسه وتحطى فكياس على قد الوجبات وعالفريزر

22- المكسرات اللوز
تسلقيه وتقشريه
وتشيليه فى علب مسلوق ومتقشر
يبقى سهل عليكى لعمل الكبسه او الارز الخلطه

23- البطاطس المحمره ازاى تفرزيها زى الجاهزة 

تمسكى البطاطس تقشريها وتقطعيها صوابع
وتكونى حاطه حله عالنار وملياها ميه وحاطه فيها ملح و وربع كوب خل
ولما الميه تغلى تحطيها البطاطس فيها
اول لما تحطى البطاطس فيها حتستنى بالظبط من 3 الى 5 دقايق

وتشيلى البطاطس على طوووووووووووول
تحطيها فى مصفا عشان تتصفى وتحطى عليها شويه زيت صغيرين
وبعدين تحطيها فصينينه وتوزعيها وفكيس وعالفريزر
وتسبيها 4 ساعات لغايه لما تجمد شويه
وتشيليها
وتفرزيها فكياس وعالفريزر دوغرى
وتطلعيها عاالقلى على طووووووووووووووووول

ويكون الزيت مقدوح كويس مقلوكش ع طعمها طريه من جوة ومقرمشه من بره
او ممكن تعملى نفس الطريقه بس بدل الميه المغليه تقليها نص قليه من 3 ل5 دقايق بردك

شوفى الطريقه اللى تعجبك وفرزيها بيها
انا بعمل الطريقه الاولى
ومتنسيش وانتى بتقطعى البطاطس تحطى حله فيها ميه عشان مش تسود

متنسوش اى اكل تفرزوا فكياس تطلعوا الهوا اللى جوا الكيس كويس جدا


24- الثوم


بيتفرز بكذا طريقه يا بنات
الثوم بيتقشر وتغسليه كويس
ويتنشف بفوطه نضيفه وزى الفل
وبعد كده تبدأى تفرزيه اى طريقه من الطرق دى

الطريقه الاولى
فصوص الثوم زى ما هى

وتحطيه فى كيسه وتطبطيه وعالفريزر
ولما تستخدميه تطلعيه كام فص انتى محتاجاه
وتسبيه بره 5 دقائق او 10 دقائق وبعد كده تفرميه فالكبه


الطريقه الثانيه
الثوم المفرووم فالكبه دون اضافات

وحطيه فكيس وتطبطيه وتفزيه عالفريزر
ولما تيجى تاخدى منه تكسرى حته وتستخدميها فى اكلك

الطريقه الثالثه
معجون الثوم

1- تحطى فصوص الثوم فالكبه
وعليهم ملعقه صغيره ملح + ملعقه صغيرة سكر
وشويه زيت اى زيت متاح عندك سواء زيت زيتون او زيت ذره
وتضربيهم كويس جدا فالكبه حيبقى شكله كده فى ملمس كريمى
وتعملى الكميه اللى عندك كلها بالطريقه دى

2- تحطيه فى اى برطمان عندك او علبه

3- لو حتحطى برطمان فى الثلاجه يبقى تضعى على الوش
شويه زيت اى زيت متاح عندك زيت زيتون او ذره



4- ولو حتحطيه فالفريزر او حتعملى برطمان اخر وتحطيه
فالفريزر
يبقى تحطيه من غير وضع زيت عالوش
وتحطيه فالفريزر عادى جدا
وحيسهل عليكى تستخدميه فالاكل وبكل سهوله
وتاخدى منه بملعقه ناشفه


الطريقه الرابعه
مكعبات الثوم
انا ددى مش مصوراها لانى معملتهاش عملت معجون الثوم وفرزته زى ما انتوا شايفين
بس سهله

بتعملى الطريقه الثانيه وبعدين تجيبى صينيه وتحطى عليها ورق زبده
وتفردى عليها الثوم وبعدين تحطيها فالفريزر لمده ساعه
اول ما يبتدوا يتماسكوا ويجمدوا تطلعى الصينيه وتمسكى السكينه تقسميها
مربعات وتشيلى كل مربع تحطيه فعلبه عندك وعالفريزر
وتطلعى المكعب عالاكل على طوووول

دى يا بنات طرق تخزين الثوم
اختارى اى طريقه تعجبك واعمليها


24- الكبده 

حتقطعى الكبده وبعدين تتبليها وتسبيها فالتتبيله شويه
وبعدين تفرزيها فكياس على قد الوجبات والكميه اللى تكفى عدد الاسرة
وتطلعى من الكيس الهوا وتقفليه كويس
وتحطيه عالفريزر ع طووووووووووووووووووول
لما تيجى تطلعيها تطلعى الكيس قبل الاكل بنص ساعه عشان يفك شويه
وتبدى تسويها ع طوووووووول وجمبها بطاطس محمره وتقدميها وبالهنا والشفا
مش حتاخد من وقتك غير 10 دقائق
واقل كمان
لانك مفرزه كل حاجه فالفريزر



32- لمحبى الحمام المحشى 

تمسكى الحمام تحشيه ارز او فريك وبعدين تخيطه كويس بخيط
وتسلقيه وبعد ما يتسلق تسبيه يتصفى فمصفا ويبرد وتلفيه فكياس
وعالفريزر على طووووووووووول يطلع على القلى على طوووووووووووووووول
والرز والفريك بسويهم الاول يا بناااااااااااااااااات عادى جدا


33- الممبار ( العصبان) 

تمسكى الممبار تنضفيه كويس جدااااا وتحشيه بخلطه المحشى وتسلقي
الممبار كويس وبعد ما يتسلق تصفيها فمصفاه
وبعدين تحطيها فكياس وعالفريزر على طووووول تطلعيه عالقلى على طووول
ومش بياخد من وقتك جاجه خالص بدل ما اليوم اللى حتعمليه تحشى وتنضفى
ويبقى وجع دماغ


34- الفراخ البانيه 
مسكتها تبلتها وسبتها شويه فالتتبيله وبعدين عملتها بالبيض والبقسماط
وبهرت االبيض وبهرت البقسماط مع شويه بيكنج بودر
وفيجتار
وحطيتها فى اطباق وعالفريزر وتطلع عالقلى



35-صدور الفراخ المتبله لعمل شاورما او فاهيتا او مشويه عالنار على جريل او فطاسه

بصوا انا هنا عندى الفراخ البانيه زى ما قولتلكم قبل كده
بجبها صدور وبقطعها مش بتيجى متقطعه جاهزة زى مصر
بعمل ايه بيها
بقطعها طرنشات للبانيه وبتبقى فيه اجزاء مش بتبقى مفروده
فمتنفعش للبانيه فبمكسها اخصصها لعمل شاورما او فاهيتا
فالحاله دى اقطعها حتت صغيره
او او اشويها على جريل او طاسه
لو شاوتها امسك ايد الهون وادق عليها شويه عشان تتفرد شويه

وبعد كده اتبلهم كويس واسيبهم فالتتبيله كويس وافرزهم فيس على قد الوجبات
وهما بتتبيلتهم يا دوبك تطلعيهم يفكوا وبعدين تسويهم عالنار مع شويه اضافات عليهم
زى البصل الفلفل الاخضر عايزة تضيفى طماطم براحتك


36- المخ 

تمسكى المخ تغسليه براحه وبشويش اوووووووووووووى
وبعدين تسلقيه كويس وتحطى فميه السلق شويه ملح وفلفل اسود
وشطه
وبعد ما يتسلق كويس تحطيه فمصفاه ولما يبرد تماما تقطعيه بشويش اوووووى
شرايح وتعمليه بالبيض والبقسماط وما بين طبقه وطبقه تحطى كيسه وعالفريزر
دوغرى وتطلعيه عالقلى على طوووووووووووووووووووووووووووول
ويكو ن الزيت مقدوح كويس وحامى
ويكون الزيت مش غزير يا بنات


37- الكفته سواء كفته لحمه او كفته فراخ او كفته ارز
او كفته جمبرى او كفته سمك او كفته داوود باشا

حتمسكى الكفته تتبليها بطريقتك وتصبيعها او تعمليها دواير بعد ما تبليها وفطبق فايبر وعالفريزر وتطلع عالقلى
او السوا

38- الجمبرى البانيه 
حتتبليه بعد ما تنضفيه
وتشيلى الخيط الاسود الرفيع
اللى بيبقا فالضهر وتعمليه بالبيض والبقسماط وعالفريزر دوغرى
تطلعيه عالقلى

39- السبيط 
حتبليه وتعمليه بالدقيق وعالفريزر تطلعيه عالقلى على طووول


40-التمر 

تفصصى التمر وتشيلى النواه بتاعته
وتحطى فى اى علب من علب التالاجه وتحطيه فالتلاجه
ممكن تعمليه قبل رمضان باسبوع او اتنين

ولو عايزة ترمى النواه بتاعته براحتك لو عايزة تحمصيها
وتدقيها بايد الهون وبعدين تطحنيها كويس لتصبح
بودره وتشليها فى برطمان وتستخدميها مع اى زيت لعمل حمام زيت للشعر او
لعمل ماسك للشعر
حتساعد على تطويل الشعر بطريقه رهيبه وكمان الرموش


41- قمر الدين سواء مهلبيه او عصير


تمسكى كيسه قمر الدين تفكيها وتحطيها فى حله وعليها 15 ملعقه
سكر وكوب ماء وتاخديها غلوة او كام غلوة على النار
عشان كأنه قمر الدين بيتسلق على النار وبعد ما تغلى كويس تقفلى النار
وتسبيها تبرد وبعد ما تبرد تماماااااااااااااااااااااااااااااا
تحطيها فى اى علبه عندك وعالفريزر زى ما هى
وبعد كده تطلعيها من الفريزر وتسبيها تفك وبعد ما تفك
تشوفى حتعمليها مهلبيه ولا عصير ولو حتعمليها عصير حطى نصها فالخلاط معاه شويه ميه
واضربيه جيدا ضربا مبرحا ههههههههههههههههههههههه
وحطيه فى ازازيز والتلاجه اعملى النص الاخر بنفس الطريقه
عشان تحصلى على عصير قمر دين


42- الكنافه 

هاتى الكنافه ولفيها رول وتحطيها فكيس وعافريزر على طوووووووووول

لما تطلعيها لو عايزاها تعملى الكنافه بتاعتنا العاديه
استنى لما تفك ولعدين تقصيها بالمقص او بايدك حتت صغيره
ووادعكيها بشويه سمنه وبعدين حطي نصها فصينيه
واحشيها مكسرات او اى حاجة انتى حاباها
وحطى النص الاخر من الكنافه ططبقه تانيه فوق المكسرات مثلا
وحطيها فالفرن

لو عايزه كنافه عثمانليه كنوع اخر من الكنافه
طلعى الكنافه من الفريزر وهى مجمده حاولى تفرتيها بايدك وتفركيها
واعمليها عثمانليه لانها بتتعمل بالطريقه دى الكنافه العثمانليه
وبتكون محشيه غالبا قشطه



43- القطايف 
هاتى القطايف احشيها مكسرات وقفليها كويس وحطيها فطبق فويل وبين واحده ووحده
مسافه صغيره عشان تعرفى تطلعيها للقلى
اعمليها بالطريقه دى وبين طبقه وطبقه كيس
ولفي الطبق الفويل فكيس

وطلعيها عالقلى على طوووووووووووووووووووووووووول
بس لما تيجى تطلعيها من الطبق طلعيها بشويش وبراحه

وتطلعى على عدد القطايف على قد ما حتاكلوا
لان القطايف من ضمن حلويات رمضان اللى لو عملتيها بكميه
وبردت ممتتكلش
فالطريقه دى بتكونى مفرزها وعالقلى على طوووووووووول

ولو عايزة تعمليها بالقشطه تمسكى القطايف تعمليها على شكل قرطاس
وتفرزيها تطلعيها تقلى وبعد القلى تحشيها قشطه وبالهنا والشفا



44- المكسرات حلويات رمضان 

هاتى المكسرات اللى بتحبى تضعيها فالكنافه والقطايف
وهى
جوز هند لوز عين جمل زبيب سودانى اى مكسرات تحبيها
وحطيها فعلبه وفاالفريزر
بحيث لما تحبى تحشى حاجه مكسرات تطلعيها تفك وتحشى على طوول


45- الشربات 
جهزى شربات حلويات رمضان وضعيه فزجاجه وفالثلاجه
ويبقا جاهز ساعه الاستخدام تضعيه عالكنافه او القطايف وهما سخنين

46- الفراوله كفاكهه للاكل او للعصير 

حتمسكى الفراوله تشيلى عنقها وتغسليها كويس وتصفيها كويس جدا


وبعدين تشيلى جزى منها فالتلاجه عادى جداااااااااااااااااااا للاكل لو حد حب ياكل
فراوله فى اى وقت

والجزء الاخر تقسمى فى اطباق تشيلى الفراوله زى ماهى وبين طبقه وطبقه تحطى كيس
وعالفريزر

ولو فيه فراوله كبيره تمسكى علبه تلاجه تقطعى اى فراوله كبيره قطع زى طرنشات او حلقات
وتحطى عليها سكر وتشيليها فى الفريزر
بحيث لو حبيتى تعملى فروت سلاط يعنى سلطه فاكهه

ولو لقيتى اى جزء فالفراوله بايظ او معطب قطعيه بالسكينه على طول
حتلاقى بقيه الفراوله زى الفل ونضيفه
وممكن تطلعى الفراوله اللى انت ىمفرزاها زى ما هى صحيحه عالخلاط
على طول وتضربيها كويس وتعملى عصير فراوله وممكن تعمليها بالطريقه دى
بس تزودى معاها موز يبقى عصير فراوله وموز

ومش انصحكم انكم تضربوا عصير الفراوله وتشلوها فالفريزر عصير
انتم ممكن تعملوه كده دى طريقه تالته بس انا مش بنصح بيها
لانى قبل كده لما عملتها وجيت طلعت العصير ولما فك عشان اشربوه لقيته كله ميه
يا بنات
فدى انسب طرق تفريز الفراوله اللى توصلت اليها


48- الخوخ 
تغسلى الخوخ كويس وتسبيه يتصفى
وبعد كده تقسميه نصين وتشيلى بذره وتفرزيه على كده

لما تيجى تطلعيه تسبيه يفك وتاكليه على طوووووووووووووول


49- البرجر الفراخ او اللحمه لعيالك 

تفرمى الفراخ او اللحمه فالبيت وتعملى البرجر فالبيت وتشليه اقراص
فطبق فيبر وبين طبقه وطبقه كيس وتفرزيه عالفريزر دوغرى تطلعيه قرص
البرجر على القلى على طول وفطاسه فيها شويه زيت صغيرين اوووووووى



50- البشاميلات الجاهزة عسوا فالفرن على طوووووووول


ممكن تعملى مكرونه بالبشاميل تجهزيها او كانيلونى او رقاق
وتفرزيه عالفريز او الديب فريزر
ولما تحتاجيه تكلعيه تستنى لما يفك وتسوى فالفرن عادى جدااااااااا

ولو عملتى مثلا مكرونه بالبشاميل جاهزة واتبقت كام قطعه
او نص الصينيه مثلا مترمهمش لا
حطيهم فى اطباق فيبر وعالفريز لما تحتاجيهم لو يوم مكسله
تعملى اكل تطلعى قطعه
المكرونه بالبشاميل وتسخنيها فالمايكرويف حتبقى طعمها كانك لسه عملاها

51- البرتقال 
اعملى البرتقال عصير وصفيه
وحطيه فعلبه وفالفريزر
وتطلعيه من الصبح عشان يفك او قبليها بيوم

52- الشعريه ولسان العصفور 
حتحمريهم فشويه زيت او من غير زيت
وتسبيهم يبردوا تماما وتحطيهم فعلب او برطمانات
وتستخدميهم عالميه على طول
انا بحمرهم على نار هادئه من غير زيت


53- البط او االفراخ المحشى
انا الصراحه بحب اعملهم طازة
لكن ممكن تفرزيهم زى الحمام المحشى
مبحبش افرزهم عشان بياخدوا مكان كبير فالفريزر


وقيسوا على كده يا بنات اى حاجه بقى
حبايبى انا كده جبت معظم الاكل والفاكهه والعصائر
وكمان حلويات رمضان طريقه تفريزها ازاى حبايبى



بصوا انتم دلوقتى مفرزين كل حاجه فالفريزر او الديب فريزر عندكم
مثال مفرزه الخضار وصلصه الطماطم والبصل والثوم

حتطلعيهم تحطى فالحله شويه زيت مع بصل وثوم وتحمريهم كويس
وبعدين تنزلى بالخضار تاخديه تشويحه وتنزلى بالصلصله اللى انتى عملاها
ويادوبك حتعملى اللحمه فقط
وبكده حضرت وجبه خضار بسرعه
الارز مثلا حتعملى ارز بالشعريه انتى محمره الشعريه ومجهزاها
يادوبك حتحطى الميه مع السمنه او الزيت وملح وشويه شعريه ولما الميه تغلى
حتحطى الارز
طبق الشوربه اساسى ع فطار رمضان

انتى مجهزة مكرونه لسان العصفور يادوبك حتحطيها مع اى شوربه انتى عملاها
او حتعملي الشوربه لسان العصفور بمكعبات ماجى
نيجى عند المحاشى
انتى مفرزه اي نوع من انواع المحاشى حتطلعى ورق العنب او الكرنب تسبيهم يفكوا
ولو الكوسه او بتنجان تحشيهم زى ما هما مجمدين
ومفرزه خلطه المحشى مش ناقصها غير الرز بقى كده عندك كله حاهز
عالحشو على طووووووووووووووووول

قيسى على كده بقى اى نوع اكل عايزه تعمليه
وحلويات رمضان

وبالشكل ده وفرنا فالمجهود وبقى عندنا وقت لرمضان 

للعضوة وئام
منتدى فتكات

اللى حابة تشارك فى الموقع بوصفة 
او اقتراح
او فكرة
تتفضل تضييها فى التعليقات
او تزور صفحتنا على الفيس
مدونة حياة مصرية

تصنيف : تدبير منزلى