السلام عليكم
بصو فى بنات كتير بياخدو الزبده وبيكونو مش عارفين يسيحوها
وطبعا عارفين انها لو مش استوت كويس بتبوظ بسرعه
ولو استوت اوى طعمها بيبقى مش حلو فلازم تعرفى امتى بالظبط تطفى النار عليها
بصى بقا الزبده النضيفه او النوع الكوبس بتكون طعمها قوى ودسمه
لما تدقويها كده تحسى بطعمها طبيعى مفيش اى حاجه زياده
كمان لما تيجى تسيحيها هتلاقيها ريحتها جامده جداا وقالبه البيت ولونها مايل للاخضر كده بس ده مش شرط حكاية اللون ده بس لو كده يبقى خير وبركه
ومع التسيح هتلاقيها بطلع كمية مورته مش كبيره لان الى فيها مورته كتير بتكون كلها لبن ومش صافيه
وكمان المورته خشنه مش ناعمه زى الرمل الناعم كده لا حبيبات كبيره اكبر شويه
وهتلاقىها مش بتقل كتير لا بطلع كمية مناسبه من السمنه
يلا نستعين بالله ونشوف الصور
الاول هنولع النار على اصغر عين ونوطى لتحت على اخر حاجه
ونحط الحله وفيها الزبده الى هتتسيح
ونقلب بقا لحد ما تسيح خالص والنار موطيها على الاخر وديه اهم حاجه
كده ساحت خالص وانا بقلب بردو
هتبتدى تطلع رغاوى زى الصابون كده كثيف على الوش
بتفضلى تقلبى بسرعه جدا عشان مش تفور منك
هنا بقا مع التقليب المستمر وطول البال الرغاوى ديه كلها بتنزل فى الحله من تحت
وهى ديه الى بتكون المورته
زى الى فى المعلقه كده ديه المورته هى كده لسه لونها ابيض اوى مش استوت
وبردو النار لسه زى ما هى وانتى بتقلبى
اول ما حس ان المورته لونها اصفر شويه اركز اوى عشان متزش فى السوا اطفى على طول افضل واقفه بردو وبقلب فيها بعد ما اتطفت عشان السمنه بتبقى درجة حرارتها عليه جدا وممكن تسوى المورته زياده عن اللزوم بفضل اقلب اول ما اشوف لون المورته بقى دهبى وحلو زى ما انا عايزه
اكون مجهزه حله اكبر فيها ميه لحد ربعها وانزل الحله بتاعت السنه فيها عشان تفقد حرارتها بسرعه وتبرد
بس كده بسبها بقا لما تبرد خالص خالص واحطها فى البرطمان بتاعى وادخلها التلاجه على طول
ولما بتيجى طلعيها بتلاقيها مرمله وبيضا زى القشطه وريحتها تجنن وطعمها رووووووووعه
للعضوة:rotana209
من فتكات
0 التعليقات:
إرسال تعليق