السبانخ للمبتدئات من مطبخ ام ليانا

الموضوع النهاردة سهل جدا على المحترفات 
وهو الـ سبانخ بس ناس كتير وانا منهم ماكنتش بعرف اعمله اول جوازى

كمان كتير مننا بيعملها بطرق مختلفة ,,اللى بالرز والكسبرة الخضرا زي حماتى واللى بالحمص والكسبرة الناشفة والرز برة زى امى

ولان كل فريق متمسك بطريقته قلت مش السبانخ اللى هتخللينا نخسر بعض 

دمجت الطريقتين فى بعض وطلعت تحفة كله حبها من ساعتها

معلش بعتذر .. اللى يدخلى موضوع يحاول يتحمل رغيى 

الطريقة والمكونات

انا استعملت حزمتين سبانخ كل حزمة فيها حوالى نص كيلو 
وحزمة كبيرة كسبرة خضراء 
5 طماطم كبيرة حوالى كيلو الا ربع 
وبصلة كبيرة او اتنين صغيرين اللى كان موجود عندى 
و5 فصوص توم كبيرة او زى ما تحبى 
وصلصة 
وكسبرة ناشفة وملح وفلفل وجوزة الطيب
وحمص طبيخ منقوع قبلها بساعتين فى مية مغلية
واللحمة انا استعملت الستيك بقرى المعرق زى الرخام ده لانها بتدى طعم حلو

زى الصورة ما مبينه الحمص نقعته فى مية مغلية قبلها بساعتين على الاقل 
واللحمة شفيتها من العضمة الكبيرة وقطعتها حسب فورمتها هى 
بعدين فرمت البصلة

فى حلة كبيرة حطيت حتة سمنة صغيرة وسيبتها لما قدحت وشوحت فيها البصلة مع معلقة زيت زيتون

ولما اصفرت كنت غاسلة الحمص ومصفياه حطيته اخد معاها تحميرة 

نخش على الجزء اللى كتير مش بيركزا فيه وده للمبتدئات بالاخص 
اللحمة لو ما اتغسلتش كويس ممكن تبوظ الطبخة كلها خللى المية تجرى عليها واغسليها بايدك كويس وغيرى المية عليها كذا مرة لحد ما تروق خالص وصفيها كويس
وضيفيها على البصل والحمص وقلبى وبعدين غطى عليها وهدى النار وسيبيها تطلع ميتها وترجع تشربها 
وبعدين شيلى الغطا وقلبيها كويس لحد ما كل ميتها تختفى .. بس مش تتحرق ..ليه؟؟ 
لان لو لسة فيها مية ختخلى الصلصة لونها بهتان

دلوقتى اللحمة اتشربت جه وقت الصلصة
ضربت الطماطم ومعاها معلقة سكر ومعلقة صلصة وصفيتها على الحلة 
سيبت الحلة من غير غطا والنار هادية لحد ما الطماطم ميتها قلت خالص
انتى حرة لو عايزة تسبكيها جامد

تجهيز السبانخ 
فى كل حتة فى الدنيا السبانخ مليان تراب وطينة ولازم تتغسل كويس اوىلازم تملى حاجة عليا مية وتغطسيها كويس وتتأكدى انها نضفت تماموتبدئى تقطعيها بسمك عقلة اصبع 
والكسبرة طبعا زيها .. لازم تتغسل حلو
وتقسميها نصين .. نص تقطعيه مع السبانخ تستوى معاه ونص تفرميه مع التوم للتقلية

دلوقتى الطماطم اتسبكت .. نضيف شوية مية وملح وفلفل 
ولما تغلى نضيف السبانخ بالكسبرة 
الخطوة دى بتحافظ على اكبر كم من الفيتامينات والحديد فيها
احسن من ما تحطيها قبل الطماطم تنزل ميتها وتفقد كل خواصها طبعا هى دلوقتى كتير اوى لكن بتنزل على طول 
واول ما تغلى يجى وقت اضافة الرز انا غسلت نص كوب بس طلع كتير شوية لاننا بنحبه كتير فى السبانخ
اول ما الرز يستوى تبقى الطبخة جاهزة ومستنية التقلية بتاعتها

لتجهيز التقلية

نفرم التوم وباقى الكسبرة الخضرا 
ونقدح حتة سمنة فى حلة صغيرة او طاسة ومعاها مستكة حتة صغيرة
ونحمرهم لحد ما تتحمص زى الصورة
وساعتها نضيف معلقة كبيرة كسبرة ناشفة ورشة كمون صغيرة ورشة جوزة الطيب صغيرة "اختيارى" عشان تكمل معاها تحميص 
ونفتح على الحلة نحطها بسرعة ونقفل الغطا ونطفى النار

بيتهائلى الريحة قلبت المكان 

ده كان كل شئ بالتفصيل الاكتر من ممل لعيون احلى مبتدات واغلى محترفات .. اللى بنتعلم منهم

دلوقتى بئة انا خلصت بس امانة عليكم لو عجبكم الموضوع التقييم ودعوة حلوة منكم

وده طبق متوصى عليه للى تنورى

وما تنسوش "معلومة كدة ع الماشى" لحبايبى
ان نص كوب عصير برتقال او نص برتقالة مع وجبة غنية بالحديد بتساعد على امتصاصه بشكل جيد

للعضوة:rodi4882
من فتكات
يمكنك أيضا قراءة:

• توابل المحشى بكل تكاتها من ام انس
• عجينة البيتزا
• طريقة الكبة السورى
• القرص الطرية

تصنيف : طبخ